Xəbərlər

Həmkarlar təşkilatı tərəfindən müəllimin yubileyi qeyd edildi

Həmkarlar təşkilatı tərəfindən Quba rayonu R.Məmmədov adına Alekseyevka kənd tam orta ümumtəhsil məktəbinin Azərbaycan dili və ədəbiyyat müəllimi Muradova Səbirə müəllimənin 65 illik yubileyi münasibətilə tədbir təşkil olundu. Tədbirdə məktəb rəhbərliyi, müəllimlər və qonaqlar iştirak etdilər. Yubilyarın uzunillik pedaqoji fəaliyyəti və təhsil sahəsində göstərdiyi xidmətlər yüksək qiymətləndirildi. Çıxış edənlər ona gələcək fəaliyyətində uğurlar və möhkəm can sağlığı arzuladılar. Tədbir zamanı müəllimə fəxri fərman və gül buketi təqdim edildi. Yubilyar göstərilən diqqət və qayğıya görə dövlətimizə, ölkə başçısına, AHİK-na və hər kəsə təşəkkürünü bildirdi. Sonda xatirə şəkilləri çəkdirildi və yubiley tədbiri xoş əhval-ruhiyyə ilə başa çatdı.

Qubada ilk həmkarlar təşkilatı sədrləri ilə görüş keçirilib

Quba rayonu Alekseyevka kənd tam orta ümumtəhsil məktəbində Elm və Təhsil İşçiləri Həmkarlar İttifaqı (ETİHİ) Quba rayon komitəsinin təşəbbüsü ilə bir qrup ilk həmkarlar təşkilatı sədri ilə görüş keçirilib. Yay mövsümünün başlanması ilə əlaqədar təşkil olunan görüşün əsas məqsədi həmkarlar ittifaqı üzvləri üçün nəzərdə tutulmuş elektron xidmətlərin təqdim olunduğu e-ahik.az platformasında qeydiyyat qaydaları barədə iştirakçıları məlumatlandırmaq olub. Görüş zamanı ilk təşkilat sədrləri platformada tətbiq edilən yeniliklərlə yaxından tanış olublar. Tədbirdə iştirakçıları maraqlandıran suallar ETİHİ Quba rayon komitəsinin sədri Vüsalə Kərimova tərəfindən ətraflı cavablandırılıb, platformadan istifadənin üstünlükləri və imkanları barədə geniş məlumat verilib.

Görüşün sonunda ilk həmkarlar təşkilatı sədrləri çıxış edərək tədbirin əhəmiyyətini vurğulayıb, təqdim olunan məlumatların onların fəaliyyətində faydalı olacağını bildiriblər.

“1 İyun – Uşaqların Beynəlxalq Müdafiəsi Günü”nə həsr olunmuş “Rəngarəng uşaqlıq” adlı tədbir

Quba rayonu Timiryazev qəsəbə 14 saylı uşaq bağçasında Quba Rayon İcra Hakimiyyəti, Quba-Xaçmaz Regional Təhsil İdarəsi və Elm və Təhsil İşçiləri Həmkarlar İttifaqının Quba rayon komitəsinin birgə təşkilatçılığı və Uşaq Səfirlər Məclisinin Quba rayonu üzrə nümayəndəsi Nurdan İbahovanın təşəbbüsü ilə “1 İyun – Uşaqların Beynəlxalq Müdafiəsi Günü”nə həsr olunmuş “Rəngarəng uşaqlıq” adlı tədbir keçirilmişdir. Tədbirdə Rayon İcra Hakimiyyətinin məsul əməkdaşı, rayonun müxtəlif müəssisələrinin rəhbərləri, Uşaq Səfirlər Məclisinin nümayəndə və fəalları iştirak etmişlər. Tədbir zamanı fəallar və bağça uşaqları tərəfindən müxtəlif mövzularda çıxışlar edilmiş, rəngarəng rəqslər və əyləncəli oyunlar nümayiş olunmuşdur. Azyaşlılar onlara göstərilən diqqətdən məmnun qalmış, uşaqlara müxtəlif hədiyyələr təqdim edilmişdir. Eyni zamanda peşəkarlar tərəfindən nağıl personajları əsasında təqdim olunan maraqlı səhnəciklər uşaqların böyük marağına səbəb olmuşdur.

Qubada Müstəqillik Gününə Həsr Olunmuş Şahmat Yarışı Keçirildi

Elm və Təhsil İşçiləri Quba Rayon Komitəsinin təşkilatçılığı ilə Quba rayonu İOEUG İdman-Şahmat Məktəbində 28 May – Müstəqillik Gününə həsr olunmuş şahmat yarışı keçirildi. Müxtəlif yaş qruplarından olan iştirakçılar yarış zamanı yüksək intellekt, diqqət və strateji düşüncə bacarıqları nümayiş etdirdilər. Tədbir iştirakçılar arasında sağlam rəqabət mühitinin formalaşmasına və dostluq münasibətlərinin möhkəmlənməsinə töhfə verdi. Yarışın sonunda qaliblər diplom və medallarla mükafatlandırıldılar. Müstəqillik Günümüz münasibətilə bütün iştirakçıları təbrik edir, onlara gələcək yarışlarda yeni uğurlar arzulayırıq!

28 May – Müstəqillik Gününə həsr olunmuş rayon “Vətəni tanı!” intellektual yarışı keçirilmişdir.

28 May – Müstəqillik Gününə həsr olunmuş rayon ümumtəhsil tam orta məktəblərinin IX-XI sinif şagirdləri arasında “Vətəni tanı!” intellektual yarışı keçirilmişdir. 25 may 2026-cı il tarixində Quba-Xaçmaz Regional Gənclər və İdman İdarəsi, Quba-Xaçmaz Regional Təhsil İdarəsi və Elm və Təhsil İşçiləri Həmkarlar İttifaqı Quba rayon komitəsinin birgə təşkilatçılığı ilə Quba İdman, İstirahət, Təlim və Tədris Kompleksində, 28 May – Müstəqillik Gününə həsr olunmuş Quba rayon ümumtəhsil tam orta məktəblərinin IX-XI sinif şagirdləri arasında “Vətəni tanı!” intellektual yarışı keçirilmişdir. Öncə Quba-Xaçmaz Regional Gənclər və İdman İdarəsinin rəisi Qumru Məmmədova və Elm və Təhsil İşçiləri Həmkarlar İttifaqı Quba rayon komitəsinin məsul əməkdaşı Gülnar Məmmədova çıxış edərək, intellektual yarışın gənclərin milli-mənəvi dəyərlərə bağlılığını gücləndirmək, vətənin tarixi, coğrafiyası, eləcə də ərazi bütövlüyü haqqında biliklərini artırmaq və onların intellektual inkişafına dəstək vermək məqsədi ilə keçirildiyini vurgulayaraq bütün komandalara uğurlar arzulamışdır.

Yarışda hər bir komandanın tərkibi 2 nəfər olmaqla 13 komanda iştirak etmişdir.

Yarışın nəticələrinə əsasən

I yerə - Susay kənd tam orta məktəb

II yerə - Fizika, Riyaziyyat və İnformatika Təmayüllü Lisey

III yerə - Texniki Təmayüllü lisey

IV yerə - Zərdabi qəsəbə tam orta məktəbin komandaları layiq görülmüşdür.

Qaliblər Elm və Təhsil İşçiləri Həmkarlar İttifaqı Quba rayon komitəsi və idarə tərəfindən diplom və hədiyyələrlə mükafatlandırılmışdır.

Ulu öndər Heydər Əliyevin anadan olmasının 103-cü ildönümünə həsr olunmuş atletika yarışı.

1 may 2026-cı il tarixində Quba İdman, İstirahət, Təlim və Tədris Kompleksində Quba-Xaçmaz Regional Gənclər və İdman İdarəsi və Elm və Təhsil İşçiləri Həmkarlar İttifaqı Quba rayon komitəsinin birgə təşkilatçılığı ilə Heydər Əliyevin anadan olmasının 103-cü ildönümünə həsr olunmuş atletika üzrə Quba rayon turniri keçirilmişdir. Tədbirdə idarə nümayəndələri, müəllimlər və məktəblilər iştirak etmiş, gənc idmançılar müxtəlif məsafələr üzrə öz qüvvələrini sınamışlar. Yarış iştirakçıları yüksək əzmkarlıq və idman ruhu nümayiş etdirmişlər.

100 metr məsafəyə qaçış üzrə qaliblər:

I yer - Abdullayev Anar – Hacıhüseynli kənd tam orta məktəbi

II yer - Quliyev Eldəniz – Amsar kənd tam orta məktəbi

III yer - Telba Məhəmməd – Zərdabi qəsəbə tam orta məktəbi

800 metr məsafəyə qaçış üzrə qaliblər:

I yer - Şirinov Hacıbaba – Zərdabi qəsəbə tam orta məktəbi

II yer - Allahverdiyev Nihad – Texniki fənlər təmayüllü lisey

III yer - Ömərov Xəyyam – 1 nömrəli tam orta məktəb

Sonda qaliblər diplom, medal və hədiyyələrlə təltif olunmuşlar. Gənclərimizə gələcək yarışlarda uğurlar arzulayırıq!

“Heydər Əliyev – 103” kuboku uğrunda “Breyn rinq” intellektual oyunu üzrə turnir keçirilmişdir

Quba rayonunda “Heydər Əliyev – 103” kuboku uğrunda “Breyn rinq” intellektual oyunu üzrə turnir keçirilmişdir.

06 may 2026-cı il tarixində Quba Rayon İcra Hakimiyyəti, YAP Quba rayon Təşkilatı, Elm və Təhsil İşçiləri Həmkarlar İttifaqı Quba rayon Komitəsi, Quba-Xaçmaz Regional Gənclər və İdman İdarəsi, Yurd Gənclərin İntellektual İnkişafına Dəstək İctimai Birliyi və Quba rayon Heydər Əliyev Mərkəzinin birgə təşkilatçılığı ilə Heydər Əliyevin anadan olmasının 103-cü ildönümünə həsr olunmuş “Heydər Əliyev – 103” kuboku uğrunda “Breyn rinq” intellektual oyunu üzrə turnir təşkil olunmuşdur.

Tədbir Azərbaycan Respublikasının Dövlət Himninin səsləndirilməsi ilə başlamış, daha sonra Heydər Əliyevin və Vətən uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilmişdir. Daha sonra çıxış edən natiqlər turnir iştirakçılarını salamlayaraq onlara uğurlar arzulamışlar. Çıxışlarda Heydər Əliyevin Azərbaycan dövlətçiliyinin inkişafı və möhkəmləndirilməsi istiqamətindəki tarixi xidmətlərindən bəhs olunmuş, belə intellektual yarışların gənclər və əmək kollektivləri arasında milli dəyərlərin təbliği, bilik yarışına marağın artırılması və komanda ruhunun formalaşdırılması baxımından əhəmiyyəti vurğulanmışdır. Turnirdə rayonun müxtəlif idarə və müəssisələrini təmsil edən 10 komanda iştirak etmişdir. Maraqlı və gərgin mübarizə şəraitində keçən yarışın nəticələrinə əsasən Quba Dövlət Sosial-İqtisadi Kollecinin komandası birinci yeri qazanaraq qalib elan edilmişdir. Qalib komandalar təşkilatçılar tərəfindən kubok, diplom və hədiyyələrlə mükafatlandırılmış, sonda iştirakçılarla xatirə şəkilləri çəkdirilmişdir.

Quba rayonunda "Sağlam psixososial iş mühiti" ilə əlaqədar tədbir keçirilib.

22 aprel 2026-cı il — Quba. Quba rayonunda yerləşən Heydər Əliyev Mərkəzində Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqı Respublika Komitəsinin təşkilatçılığı ilə "28 aprel — Əməyin Mühafizəsi Günü" münasibətilə “Sağlam psixososial iş mühitinin yaradılmasını təmin edək” devizi altında tədbir keçirilib.

Tədbir Dövlət Himninin səsləndirilməsi və Ümummilli Lider Heydər Əliyevin və Vətən uğrunda canından keçmiş şəhidlərin xatirəsinin bir dəqiqəlik sükutla yad edilməsi ilə başlayıb.

Tədbirdə ETİHİ Respublika Komitəsinin sədr müavini Mirzə Cəfərzadə, Komitənin Hüquq şöbəsinin müdiri Fuad Nəsirov, Quba Rayon İcra Hakimiyyəti başçısının müavini Səidə Abasova, Komitənin Baş Texniki Əmək Müfəttişi Rəşad Səlimov, Hüquq şöbəsinin mütəxəssisi Mirvüqar Seyidov, Quba-Xaçmaz Regional Təhsil İdarəsinin müdiri Coşqun Əliyev, Fövqəladə Hallar Nazirliyinin Şimal Regional İdarəsinin rəis müavini Ruhid Hacəliyev, Dövlət Əmək Müfəttişliyinin Quba-Xaçmaz Regional İdarəsinin rəisi Təngiz Nəzərov, ADPU Quba filialının direktoru, professor Yusif Alıyev, Quba 1 saylı Mediasiya Təşkilatının rəhbəri Hümmət Əliyev, həmçinin təhsil müəssisələrinin rəhbərləri, psixoloqlar, təsərrüfat işləri üzrə direktor müavinləri və ETİHİ-nin rayon komitələrinin sədrləri iştirak edib.

Çıxış edən natiqlər sağlam psixososial iş mühitinin formalaşdırılmasının, əmək şəraitində psixoloji rifahın, emosional sabitliyin və sağlam münasibətlərin qorunmasının, eləcə də işçi hüquqlarının təmin edilməsinin əhəmiyyətini vurğulayıblar. Tədbirin sonunda iştirakçıların sualları cavablandırılıb, təkliflər dinlənilib və mövzu ətrafında geniş fikir mübadiləsi aparılıb. Tədbir xatirə şəkli ilə başa çatıb.

Ulu Öndər Heydər Əliyevin 103-cü ildönümünə həsr olunmuş şahmat turnirinin Quba rayon mərhələsi keçirilib.

ETİHİ Respublika Komitəsinin qərarına əsasən Quba rayonunun ümumtəhsil məktəblərində çalışan təhsil işçiləri arasında Ulu Öndər Heydər Əliyevin anadan olmasının 103-cü ildönümünə həsr olunmuş şahmat turnirinin rayon mərhələsi keçirilmişdir. Yarışı giriş sözü ilə açan ETİHİ Quba rayon komitəsinin sədri Vüsalə Kərimova bu cür yarışların təhsil işçiləri arasında keçirilməsinin onların motivasiyasının artırılmasına, sağlam rəqabət mühitinin formalaşmasına mühüm töhfə verdiyini vurğulamışdır. Turnir boyunca iştirakçılar arasında gərgin və maraqlı mübarizə müşahidə olunmuşdur. Yarışın yekun nəticələrinə əsasən Alekseyevka kənd tam orta ümumtəhsil məktəbinin müəllimi Osman Sultanov məğlubiyyətsiz çıxış edərək I yerə layiq görülmüşdür.

Sonda ETİHİ Quba rayon komitəsi tərəfindən I, II və III yerləri tutan qaliblərə hədiyyələr və təşəkkürnamələr təqdim edilmiş, digər iştirakçılar da təşəkkürnamələrlə təltif olunmuşdur. Qeyd edək ki, I yerin qalibi şahmat turnirinin respublika mərhələsində iştirak etmək hüququ qazanmışdır.

Təhsil müəssisəsinə bayram ərəfəsində növbəti dəstək göstərilib.

18 mart 2026-cı il tarixində ETİHİ Quba rayon komitəsinin sədri V. Kərimova Zərdabi qəsəbəsində yerləşən B. Şıxəmirov adına tam orta ümumtəhsil məktəbində görüş keçirmişdir. Görüş məktəb rəhbərliyinin və kollektivinin həmkarlar təşkilatına müraciəti əsasında təşkil olunmuş və əsas məqsəd təhsil müəssisəsinin ehtiyac duyduğu səs gücləndirici avadanlığın təqdim edilməsi olmuşdur. Qeyd edək ki, bayram ərəfəsində göstərilən bu diqqət və qayğı məktəbin rəhbərliyi və pedaqoji kollektivi tərəfindən yüksək dəyərləndirilmiş, böyük məmnunluqla qarşılanmışdır. Tədbir zamanı çıxış edənlər tərəfindən vurğulanmışdır ki, həmkarlar təşkilatlarında həyata keçirilən islahatlar respublikamızın bütün bölgələrində hiss olunmaqdadır, və bu dəyişikliklər təhsil işçilərinin sosial rifahının yaxşılaşdırılmasına və onların fəaliyyətinə dəstəyin gücləndirilməsinə xidmət edir. Görüşün sonunda məktəbin rəhbərliyi və kollektivi tərəfindən göstərilən diqqət və dəstəyə görə AHİK-na və ETİHİ Respublika Komitəsinə dərin minnətdarlıqlar ifadə olunmuşdur.

Novruz sevinci və yubiley təbrikləri!

Müqəddəs Novruz bayramı münasibətilə ETİHİ Quba rayon komitəsi Quba rayonunun Alekseyevka kənd tam orta məktəbi təhsil işçiləri ilə səmimi görüş keçirib. Məktəbin istedadlı şagirdləri öz əl işlərini təqdim edərək tədbirə rəng qatdılar. Yubiley yaşını qeyd edən müəllimlər xüsusi təbrik olundular.Uzun illər ərzində göstərdikləri əməklər üçün təşəkkürnamə, gül buketləri və pul mükafatı təqdim edildi. İştirakçılar səmimi ab-havaya görə minnətdarlıqlarını ifadə edərək, həm Novruz sevincini, həm də yubiley sevincini birlikdə paylaşdılar.

Quba rayonunda təhsil işçiləri üçün Ramazan iftarı keçirilib

Müqəddəs Ramazan ayı münasibətilə ETİHİ Quba rayon komitəsi tərəfindən təhsil işçiləri üçün Nazlı Bulaq istirahət mərkəzində iftar süfrəsi təşkil edilib. İftar məclisində birlik və həmrəylik ruhu xüsusi hiss olunub, milli-mənəvi dəyərlərin əhəmiyyəti vurğulanıb. Tədbir iştirakçılarına zəngin süfrə təqdim olunub və Ramazanın fəzilətləri ilə bağlı dualar səsləndirilib. Səmimi mühitdə keçən görüş iştirakçılar tərəfindən yüksək qiymətləndirilib. İftar süfrələrində 150-yə yaxın təhsil işçisi iştirak edib. Sonda qonaqlar təşkilatçılara göstərilən diqqət və qayğıya görə təşəkkürlərini ifadə ediblər.