Xəbərlər

“Təhsil” istirahət mərkəzində tələbələr üçün ixtisas yönümlü qış düşərgələri yekunlaşıb

Elm və Təhsil İşçiləri Həmkarlar İttifaqı və “Bir Könüllü” Tələbələrin Əməkdaşlığı İctimai Birliyinin birgə təşkilatçılığı ilə tələbələr üçün 5-9 fevral tarixlərində keçirilən ənənəvi ixtisas yönümlü qış düşərgələri yekunlaşıb.

“Təhsil” İstirahət Mərkəzində baş tutan düşərgələrin əsas məqsədi iştirakçıların ixtisas biliklərinin dərinləşdirilməsi, analitik və tənqidi düşünmə, problem həll etmə, innovativ yanaşma, eləcə də liderlik və komanda işi bacarıqlarının inkişaf etdirilməsi olub. Layihə çərçivəsində gənclərin gələcək akademik və peşəkar fəaliyyətə hazırlıq səviyyəsinin artırılması prioritet kimi müəyyən edilib.

Cari il üzrə düşərgələr iki istiqaməti əhatə edib. Riyaziyyat sahəsi üzrə “MathCamp2026” layihəsi “Bir Könüllü” Tələbələrin Əməkdaşlığı İctimai Birliyi, Elm və Təhsil İşçiləri Həmkarlar İttifaqı və “PathtoMath” Həvəskar Riyaziyyatçılar Klubunun birgə təşkilatçılığı ilə həyata keçirilib. Texnologiya və mühəndislik istiqamətləri üzrə “TechCamp2026” düşərgəsi isə “ESTIEM LG Baku” və “EESTEC LG Baku” təşkilatlarının tərəfdaşlığı çərçivəsində təşkil olunub.

Düşərgələrdə seçim mərhələsindən keçmiş riyaziyyat, texnologiya, mühəndislik və əlaqəli sahələr üzrə təhsil alan əlli nəfərə yaxın perspektivli tələbə iştirak edib. Proqram çərçivəsində ixtisaslaşmış təlimlər, praktiki məşğələlər, layihə əsaslı fəaliyyətlər və mentorluq görüşləri keçirilib.

Qeyd edək ki, Elm və Təhsil İşçiləri Həmkarlar İttifaqı gənclərin bilik və bacarıqlarının inkişafına yönəlmiş tədris və innovasiya yönümlü təşəbbüslərin həyata keçirilməsinə davamlı dəstək göstərir.

ETİHİ Respublika Komitəsi tərəfindən 700-dən çox ittifaq üzvü üçün ekskursiya və turlar təşkil olunub

Elm və Təhsil İşçiləri Həmkarlar İttifaqı Respublika Komitəsi tərəfindən yanvar ayı ərzində 700 nəfərdən çox ittifaq üzvü üçün ekskursiya və turlar təşkil olunub.

Belə ki, 533 nəfər təhsil işçisi rayon və şəhər komitələrinin təşkilatçılığı ilə Quba, Qusar, Qəbələ, Şamaxı və Astara rayonlarına təşkil edilmiş bir neçə günlük turlardan yararlanaraq istirahət ediblər.

168 nəfər təhsil işçisi isə "İçərişəhər" Tarix-Memarlıq Qoruğuna və açıq səma altında yerləşən Qala Etnoqrafiya Muzeyinə ekskursiya ediblər.

Qeyd edək ki, bu cür maarifləndirici və istirahət xarakterli gəzintilər gələcəkdə də mütəmadi olaraq təşkil ediləcəkdir.

“Azərbaycan Nəşriyyatları Assosiasiyası” İctimai Birliyində Həmkarlar İttifaqı təsis olunub

Azərbaycan Nəşriyyatları Assosiasiyasında Həmkarlar İttifaqı Komitəsinin təsis yığıncağı keçirilib. Təsis iclasında Assosiasiya nəzdində Həmkarlar İttifaqı Komitəsinin yaradılması ilə bağlı təşkilati məsələlər müzakirə olunub.

Tədbirdə Azərbaycan Nəşriyyatları Assosiasiyasının 14 nəfər əməkdaşı, həmçinin Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə və sədrin müşaviri Renata Mansurova iştirak ediblər.

Təsis iclasında Həmkarlar İttifaqı Komitəsinin və Təftiş Komissiyasının üzvləri, eləcə də komitənin sədri seçilib, yaradılan qurumun ETİHİ Respublika Komitəsinin xidmətinə qəbul edilməsi barədə qərar qəbul olunub.

Elm və Təhsil İşçiləri Həmkarlar İttifaqı Respublika Komitəsi yeni üzvləri ilə birgə həmrəyliyə əsaslanan fəaliyyət istiqamətini davam etdirməkdədir.

Yanvar ayında yollayışlardan yararlananların statistikası

Elm və Təhsil İşçiləri Həmkarlar İttifaqı Respublika Komitəsi yanvar ayında ittifaq üzvlərinə sanatoriya-kurort yollayışları təqdim edərək onların Azərbaycan Həmkarlar İttifaqları Konfederasiyasının tabeliyindəki müalicə və istirahət mərkəzlərindən faydalanmasını təmin edib.

Ay ərzində ümumilikdə 449 nəfər yollayışdan yararlanıb. Onların 216 nəfəri ittifaq üzvü, qalanları isə ailə üzvləridir.

Yanvar ayında ilk həmkarlar təşkilatlarının sədrləri üçün keçirilən proqram çərçivəsində ailə üzvləri ilə birlikdə 92 nəfər 3 günlük müalicə paketindən yararlanıb.

Bununla yanaşı, rayon və şəhər komitələrinin təşkil etdiyi ekskursiyalara 165 nəfər ittifaq üzvü cəlb edilib.

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib. Tədbirlərdə təhsil müəssisələrində çalışan gənc həmkarlar ittifaqı üzvləri, müəllimlər və ictimai fəallar iştirak ediblər.

Tədbir çərçivəsində gənclərin fikir və təklifləri dinlənilib, onları maraqlandıran məsələlər ətrafında səmimi müzakirələr aparılıb. Fəallığı ilə seçilən gənclər mükafatlandırılıb, onlara gələcək fəaliyyətlərində uğurlar arzulanıb.

Gənclər Günü – sağlam gənclik, güclü gələcək

ETİHİ Quba rayon komitəsi və Quba Dövlət Sosial İqtisadi Kollecinin ilk həmkarlar təşkilatının birgə təşəbbüsü ilə 2 Fevral – Gənclər Günü münasibətilə, Quba rayon İxtisaslaşdırılmış Olimpiya Ehtiyatları Uşaq Gənclər İdman Şahmat məktəbinin yarış zalında tələbə həmkar üzvləri arasında idmanın Şahmat növü üzrə yarış keçirilmişdir. Yarışın keçirilməsində əsas məqsəd gənclərin sağlam həyat tərzinə marağının artırılması, təhsilə və idmana olan sevgisinin təşviq edilməsidir. Görüşdə fəallıqla yarışan gənclər öz bilik, bacarıq və çevikliklərini nümayiş etdirmişdirlər. Yarışda I, II, III, IV yeri tutan qaliblər təşəkkürnamə və müxtəlif hədiyyələrlə mükafatlandırılmışdır. Zəka yarışı yüksək motivasiya və rəqabət şəraitində keçmişdir. ETİHİ Quba rayon komitəsi tərəfindən gənc həmkar üzvlərimizi Gənclər Günü münasibətilə təbrik edir, onlara uğurlar və sağlam gələcək arzulayırıq!

Gənclər Günü çərçivəsində region üzrə intellektual turnir təşkil olundu

28 yanvar 2026-cı il tarixində Quba-Xaçmaz Regional Gənclər və İdman İdarəsi, Quba-Xaçmaz Regional Təhsil İdarəsi və Elm və Təhsil İşçiləri Həmkarlar İttifaqı Quba rayon komitəsinin birgə təşkilatçılığı ilə Siyəzən Gənclər Evində “2 Fevral — Azərbaycan Gəncləri Günü”nə həsr olunmuş “Nə? Harada? Nə zaman?”intellektual oyunu üzrə region birinciliyi keçirilib. Yarış IX–XI sinif şagirdləri arasında təşkil olunmuşdur. Tədbir Dövlət Himninin səsləndirilməsi ilə açıq elan edilib. Quba-Xaçmaz Regional Gənclər və İdman İdarəsinin rəisi Qumru Məmmədova və Elm və Təhsil İşçiləri Həmkarlar İttifaqı Quba rayon komitəsinin sədri Vüsalə Kərimova çıxış edərək gəncləri Gənclər Günü münasibətilə təbrik etmiş, iştirakçılara uğurlar arzulamışlar.

Turnir komandalar arasında maraqlı və gərgin mübarizə şəraitində keçib. Nəticələr belə olub:

I yer: Fətəlixan (Quba rayonu)

II yer: Qladiator (Şabran rayonu)

III yer: Vendetta (Siyəzən rayonu)

Qaliblər Quba-Xaçmaz Regional Gənclər və İdman İdarəsi tərəfindən diplom və kubokla, həmçinin Elm və Təhsil İşçiləri Həmkarlar İttifaqı Quba rayon komitəsi tərəfindən qiymətli hədiyyələrlə təltif olunublar.

Gənclərimizi təbrik edir, onlara gələcək fəaliyyətlərində uğurlar arzulayırıq!

Zəka və strategiya simvolu – Söhrab Murtuzov

Quba rayonu İdman Olimpiya Ehtiyatları Uşaq-Gənclər İdman Şahmat Məktəbinin şahmat müəllimi Murtuzov Söhrab Novruzəli oğlu 55 yaşını qeyd edir. O, əməkdar məşqçi və FİDE (Fédération Internationale des Échecs) hakimi kimi tanınır. Quba rayonunda şahmat zəka oyunun inkişafında onun xidmətləri danılmazdır. Söhrab Murtuzovun bir çox yetirmələri dünya və ölkə səviyyəli turnirlərdə yüksək nəticələr göstərmişlər. Elm və Təhsil İşçiləri Həmkarlar İttifaqı Quba rayon komitəsi adından hörmətli həmkar üzvümüz Söhrab Murtuzovu təbrik edir, ona yeni uğurlar və daha böyük nailiyyətlər arzulayır.

2 Fevral – Gənclər Günü münasibətilə Quba Peşə Liseyində idman yarışı

Hər il fevral ayının 2-si ölkəmizdə Gənclər Günü kimi qeyd olunur. Müxtəlif dövrlərdə, hər zaman, cəmiyyətin bütün sahələrində gənclərimizə dəstək olmuşuq. ETİHİ Quba rayon komitəsi və Quba Peşə liseyinin ilk həmkarlar təşkilatı ilə birgə 2 Fevral – Gənclər Günü münasibətilə Quba Peşə liseyində tələbə həmkar üzvləri arasında idman yarışı keçirildi. Yarışda qalib gəlib, I, II, III, IV yeri tutan tələbələrimiz təşəkkürnamə və müxtəlif qiymətli hədiyyələrlə təltif edildilər.

Quba Peşə Liseyinin həmkar üzvünün 65 illik yubileyi.

65 yaş – insan həyatında müdriklik, zəngin həyat yolu və uzun illərin zəhmətinin layiqincə dəyərləndirildiyi əlamətdar bir mərhələdir. Bu münasibətlə ETİHİ Quba Rayon Komitəsinin kollektivi Quba Peşə Liseyinin hörmətli həmkar üzvü, pedaqoji fəaliyyəti ilə seçilən Dadaşbala Dadaşovun 65 illik yubiley tədbirində iştirak etmişdir. Uzun illər səmərəli və fədakar pedaqoji fəaliyyəti ilə gənc nəslin təlim-tərbiyəsində xüsusi xidmətləri olan Dadaşbala müəllim yubiley münasibətilə rayon komitəsi tərəfindən qiymətli hədiyyə və pul mükafatı ilə təltif olunmuşdur. Hörmətli Dadaşbala müəllimi 65 illik yubileyi münasibətilə səmimi-qəlbdən təbrik edir, ona möhkəm can sağlığı, uzun ömür, ailə səadəti və gələcək pedaqoji fəaliyyətində yeni uğurlar arzulayırıq!

BDU-da “Güclü dövlətin təməli – Azərbaycan gəncliyi” forumu keçirilib

Gənclər və İdman Nazirliyi və Bakı Dövlət Universitetinin birgə təşkilatçılığı ilə 2 fevral – Azərbaycan Gəncləri Gününə həsr olunmuş Ümummilli Lider Heydər Əliyevin gənclər siyasəti və Prezident İlham Əliyevin gələcəyə strateji baxışı kontekstində “Güclü dövlətin təməli - Azərbaycan gəncliyi” adlı forum keçirilib.

Forumdan əvvəl gənclər və könüllü təşkilatlarının, gənclər evlərinin təcrübə və könüllülük proqramlarının sərgisinə baxış olub.

Forumun açılış mərasimində Dövlət himni səsləndirilib, torpaqlarımızın azadlığı uğrunda həlak olan şəhidlərimizin əziz xatirəsi bir dəqiqəlik sükutla yad edilib.

Forumda BDU rektoru Elçin Babayev, Gənclər və İdman naziri Fərid Qayıbov, Gənclər Fondunun icraçı direktoru vəzifəsini icra edən Yusif Vəliyev və BDU məzunları çıxış edərək ölkəmizin gənclər siyasətinin uğurlarından danışıb, gənclərin təhsil, idman və ictimai fəaliyyət sahələrindəki rolunu vurğulayıblar.

Tədbir çərçivəsində “İlin gənc alimi” müsabiqəsinin nəticələri elan olunub, fəal tələbələrə təşəkkürnamələr təqdim edilib, Azərbaycan Gəncləri Günü münasibətilə bədii kompozisiya nümayiş olunub və “Dövlətçilik, təhsil və elm: Azərbaycan gəncliyinin strateji missiyası” mövzusunda panel müzakirə keçirilib.

ETİHİ-nin sədr müavini Mirzə Cəfərzadə Həmkarlar İttifaqı Komitəsinın fəaliyyətində aktiv olan tələbələrin mükafatlandırılmasında iştirak edib. 

ETİHİ-nin əməkdaşları SƏTƏM təlimində iştirak ediblər

AHİK-in Əmək və Sosial Münasibətlər Akademiyasında, Elm və Təhsil İşçiləri Həmkarlar İttifaqının dəstəyi ilə təhlükəsiz əmək mühitinin qurulmasına yönəlmiş beynəlxalq səviyyəli “IOSH Təhlükəsiz İdarəetmə” təlimi təşkil edilib. Təlimdə Elm və Təhsil İşçiləri Həmkarlar İttifaqı Respublika Komitəsinin 13 əməkdaşı iştirak edib.

Təlim proqramı iştirakçıların SƏTƏM sahəsində biliklərini artırmaq, risklərin idarə edilməsi, iş mühitində təhlükəsizlik mədəniyyətinin gücləndirilməsi və qabaqcıl təcrübələrin tətbiqi istiqamətində bacarıqlarını inkişaf etdirməyə xidmət edib.

Açılışda Azərbaycan Əmək və Sosial Münasibətlər Akademiyasının rektor vəzifəsini müvəqqəti icra edən Fərid Babayev beynəlxalq standartlara uyğun təşkil olunan təlimin məqsədinin əmək mühitində təhlükəsizlik və sağlamlığın qorunması, risklərin effektiv idarə edilməsi və müəssisələrdə təhlükəsizlik mədəniyyətinin gücləndirilməsi olduğunu bildirib.

Elm və Təhsil İşçiləri Həmkarlar İttifaqı Respublika Komitəsinin sədr müavini Mirzə Cəfərzadə çıxış edərək iştirakçılara iş yerində risklərin qiymətləndirilməsi, təhlükəsizlik siyasətinin tətbiqi və fövqəladə hallarda görüləcək tədbirlər üzrə biliklərin artırılmasında uğurlar arzulayib.

Təlimi uğurla tamamlayan iştirakçılara beynəlxalq sertifikatlar təqdim edilib.

Elm və Təhsil İşçiləri Həmkarlar İttifaqı bu istiqamətdə Azərbaycan Həmkarlar İttifaqları Konfederasiyası ilə təhsil sahəsində çalışan ittifaq üzvlərinin təhlükəsiz şəraitdə işləməsi və iş yerlərində əməyin mühafizəsi üzrə təlimatlara ciddi əməl edilməsi məsələlərini diqqət mərkəzində saxlamağa çalışır.